من طرف 
الحب ... احساس جميل
ما يعرف جماله الا اللي يحب من قلبه وبكل جوارحه .
مو شرط يكون شاعر أو فنان أو متعلم ... المهم انه يكون يحب من كل قلبه .
المهم انه يكون ما بيكذب على نفسه ويتوهم انه يحب أو حتى يصطنع الحب .
القلب هو اللي يتكلم ويقول انه الحب جاء مو اللسان .
وأحلى
من كده انه العقل يكون راضي عن الحب دا كل الرضا . وان لا يتمنى للحب دا
إلا كل خير ويقتنع انه لسه ما وجد الحب الكامل أو يوصلوا إلى نقطة تفاهم
ويعيش بالحب العادي وان كان كبير فهو حب عادي ( للحب درجات ).
أما اللي يحصل الحب الصادق ويحافظ عليه ، حيعرف معنى كلمة الحب حتى لو كان جاهل .
صعب
انك تفهّم شخص الفرق بين الحب الحقيقي والحب الوهمي ( العادي اللي كل
الناس يعتقدوه الحب النقي الكامل ) اللي 99% من الناس يوقع فيه ... لازم
تقابل الحب الحقيقي علشان تعرف الفرق ... لكن حنتكلم عن بعض الفروق اللي
بيناتهم لكن قبل ما أتكلم عن الفروق أبغ أوضح بعض الملاحظات -:
( ملحوظات ):
1-
لازم اللي يبغ يختبر نفسه على دي الفروق يكون لوحده وصادق مع نفسه وبيفكر
بعقله مو بقلبه ويحاول يفتكر نفسه وصفاته والمواصفات اللي كان يبغاها قبل
ما يقابل الحب اللي بيختبر نفسه عليه ، وإلا ما ينفع الاختبار ولا يكذب
على نفسه ونصيحة لا يحاول انه ما يسمع صوت عقله وهو بيتكلم لأنه العقل مهم
جداً .
2- أي مواصفات سواء كانت صغيرة جداً أم كبيرة مهمة جداً في
الاختبار ولا تحاول تتجنبها ، لأنه لازم تتوافق كل الصفات من أصغرها إلى
أكبرها .
الفروق اللي بين الحب الحقيقي وأي حب ثاني :
0- هل هي
دي البنت أو الشاب اللي كنت تتمناه بكل جوارحك وعقلك . أقصد ( هل لو
أعطيتك صلصال وربي أعطاك موهبة صناعة الروح والقلب " قبل ما تقابل الشخص
اللي تعتقد انك تحبه " مهم ) ، هل كان صنعت نفس الشكل و وضعت نفس
المواصفات من صغيرها إلى كبيرها اللي موجودة في الشخص اللي تعتقد انك تحبه
و زرعت في دا الصلصال نفس القلب والعقل والروح اللي هي موجودة فعلاً في دا
الانسان أو الانسانة ، ولا في اختلاف في بعض أو قليل من الصفات ( الصغيرة
، الكبيرة ، التافهة ) أو اختلاف بسيط جداً في ( الشكل ، اللون ) أو
اختلاف بسيط في الروح أي ( طريقة الحب ، خفة الظل ، وغيره كثير ) أو
اختلاف بسيط في العقل و طريقة التفكير أو اختلاف بسيط في القلب ( الحب ،
الحنان ، التضحية ) .
هل كانت مواصفات الشكل هي اللي كنت تتمناها .
هل نفس ( لون البشرة ، نفس الهيكل ، نفس لون العين ، إلخ ).
هل فيها كل المواصفات الصغيرة والكبيرة اللي كنت تتمناها .
هل تفهمك "يفهمك" من غير ما تتكلم "تتكلمي" ؟ وتفهمها "تفهمي" من غير تتكلم "يتكلم" ؟ هل نفس طريقة التفكير ؟ هل نفس العقل ؟
هل هي دي الروح اللي كنت تتمناها ( الدعابة ، الحب ، الحنان ، درجة التسامح ، الدين ، الطموح ، الآمال ، وغيرها كثير ) .
هل هو دا القلب اللي كنت تتمناه .
هل
لما تنظر لها بعقلك من غير قلبك ما تحصل أي عيب أو أي شيء غير راضي عنه .
أي بمعنى ( في أي اختلاف بين الشخص اللي انت صنعته والشخص اللي تعتقد انك
تحبه ((( فكر بعقلك مو قلبك " مهم جداً " ))) .
هل لما تنظر لها بعقلك
من غير قلبك تستغرب من انه الشخص اللي في خيالك موجود بكل المواصفات
والمعايير أمامك . لدرجة انك منت مصدق وكل يوم تعرفه أكثر تستغرب أكثر من
التشابه كأنه انسان خرج من داخل خيالك إلى الواقع .
هل كانت في أشياء
كنت تحبها بس عمره ما جاء على بالك انك تحطها شرط أو صفة تتمنى توفرها في
حبيبك وأتفاجئت بأنها موجودة في الانسان دا هل انت مستغرب من انها كأنها
خرجت من خيالك إلى الواقع مرة ثانية .
هل انت متأكد انه حبيبك بيتصرف
على طبيعته ولا بيحاول انه يعرف الأشياء و الصفات اللي انت تحبها ويصطنعها
أمامك علشانه يحبك وتحبه ، لأنه دا معناته انه بيخدع نفسه وييخدعك . (
لازم يكون على طبيعته )
هل تتمنى أي صفة موجودة في أي ( بنت أو شاب )
انها تكون موجودة في حبيبتك ، أم حبيبتك كاملة المواصفات بطريقة غير
معقولة ( لا تصدق ) لدرجة انك تحس انك أكتفيت من كل المواصفات ومن كل (
البنات أو الشباب ) بحيث انك منت شايف غيرها بكل ثقة وبكل صدق مع نفسك
وانها هي توأم روحك ومستحيل جداً انك تحصل زيها في الدنيا حتى لو عشت أبد
الدهر وانها واحدة مافي زيها ( خرجت من خيالك علشان تعيش في دنيتك معاك )
نعمة من ربك تشكره وتحمده عليها .
هل تحس انها قطعة منك وانكم المفروض تكونوا انسان واحد ولكنكم أنقسمتوا نصفين ( متشابهين في كل شيء ) .
هل انت تحبها وهل هي تحبك وهل حتحافظ على دا الحب وتفديه بحياتك .
هل تفديها بحياتك ؟ هل تحبها أكثر من نفسك ؟
اذا أتوفرت كل دي الصفات فانت من جد ممكن تكون وجدت الحب الحقيقي
وصدقوني
كلامي جداً بسيط بالنسبة للحب الحقيقي ولو أتكلمت من اليوم إلى أن أموت ما
أقدر أوصفه زي ما قلت في البداية لازم تقابل دا الحب علشان تعرفه و 99% ما
يقابله دا الحب إلى أن يموتوا وهذه نعمة من ربي يعطيها من يشاء من عباده .
لا
تنسوا في الاختبار لازم تكون لوحدك وتكون صادق مع نفسك وتفتكر نفسك قبل ما
تقابل دا الشخص وتراجع نفسك وتعرف هو دا اللي من جد انت تبغاه ولا في
اختلاف بسيط. أكرر الصدق مع النفس أهم شيء ، ولا تهتم لكلام الناس ولا
تخاف من انك تواجه الحقيقة اللي انت من داخلك عارفها بس ما تبغ تسمعها
علشان ما تصدقها وتنصدم بمعرفة انك ما عرفت الحب الحقيقي ولا تخاف من انك
تكذّب قلبك والشعور اللي في داخلك ( لأنه ممكن يكون حب كبير وجميل لكنه مو
الحب الحقيقي النقي مهما قلت انه حبك كبير ). لا تكذب على نفسك ، وعلى
فكرة شيء عادي انك ما تحصل الحب الحقيقي لأنه دي نعمة من الله يهديها من
يشاء و 99% كما ذكرت ما يحصلوا دا الحب .
